(ବୀରବିକ୍ରମ ଦେବ— ରାଗ କୁମ୍ଭକାମୋଦୀ, ତାଳ ଯତି)
କହିବେ ସହି ଶ୍ୟାମ ଛାମୁରେ ଯାଇ
କିଞ୍ଚିତ ବିଳମ୍ବ ଦେଖି ସଖୀ
ଆନ ପାଞ୍ଚିଲାନି ବୋଲି
ଆହେ ନବଘନ ସୁନ୍ଦର ଗାତ୍ର
ରାତ୍ର ନୋହୁ ଆଉ ଆସ ଯିବା ବୋଲି । ଘୋଷା ।
କଞ୍ଜନିଭ ନେତ୍ର ଆସିବା ହେଜି
କୁଞ୍ଜ ମଣ୍ଡପକୁ ଯତନେ ସାଜି
କଞ୍ଜଶର ଶର ତାପକୁ ଭଜି
ସଞ୍ଜବେଳୁଁ ଚାହିଁ ରହିଅଛି ବୋଲି । ୧ ।
ଦେବକୀ ନନ୍ଦନ ନିଖିଳ ଈଶ
ସେବକୀ ଭାବରେ ହେବାର ବଶ
ହେବକି ମର୍ଦ୍ଦନ ହେବକି ଦୋଷ
କର ଯୋଡ଼ି ସହି ଜଣାଉଛି ବୋଲି । ୨ ।
କଙ୍କେଳି କୁଞ୍ଜରେ ମୁରଲୀପାଣି
ଅଙ୍କେ ବସାଇ କହିଥିବା ବାଣୀ
ସଙ୍କେତ ହୋଇଛି ମନେ ତା ଜାଣି
ପଙ୍କେରୁହ ନେତ୍ର ଭୁଲିଲ କି ବୋଲି । ୩ ।
ଘନକୁ ଚାତକ ଧ୍ୟାୟିଲା ପରି
ମନ ତୁମ୍ଭ ଠାରେ ଦେଇ କିଶୋରୀ
ଅନୁବ୍ରତେ ଅଛି ପ୍ରେମରେ ପୂରି
ଶ୍ରୀ ବୀରବିକ୍ରମ ବୋଲୁଥିଲା ବୋଲି । ୪ ।