(ବୀରବିକ୍ରମ ଦେବ— ଆଡ଼ତାଳି)
ଯୁବତୀ ମତି କିଏ କଳିବ ରେ
ମୁଖେ ଥାଏ ନାହିଁ ଚିତ୍ତେ ଥାଏ ରହି
ଅଙ୍ଗୀକାର ସଦା ପ୍ରେମିକ ପ୍ରତି । ଘୋଷା ।
ରହିଥିଲେ ସଜନୀଙ୍କ ସମାଜେ
ସମ୍ମୁଖେ କେବେ ନ ଅନାଏ ଲାଜେ
ପଛ କରି ନିଜେ ଦେଖିବାର ବ୍ୟାଜେ
ଝୁଣ୍ଟିଆକୁ କରେ ସଳଖୁଥାନ୍ତି । ୧ ।
ଦଇବେ ନୟନ ହେଲେ ମିଳନ
ଦିଶୁଥାନ୍ତି ହେଲା ପରି ଉଚ୍ଛନ୍ନ
ହୋଇଗଲେ ଭିନ୍ନ ନ ରୁଚଇ ଆନ
ଝୁରି ନ ସରଇ ଦିବସ ରାତି । ୨ ।
ଭାରତୀ ଶ୍ରବଣେ ହୋଇ ଉତ୍ସୁକ
କଲେ ହେଲେ ପରିଶ୍ରମ ଅନେକ
ବୁଡ଼ାଇ ବିବେକ ମଉନେ ଅଧିକ
ବସିବା ନିଜ ସମ୍ମାନ ମଣନ୍ତି । ୩ ।
ଶ୍ରୀ ବୀରବିକ୍ରମ ଦେବ ବୋଲଇ
ବସିଥିଲେ ହେଲେ ମଥା ନୁଆଁଇ
ଡୋଳାକୁ ବୁଲାଇ କି ଚଞ୍ଚଳେ ନେଇ
ପ୍ରତି ଅଙ୍ଗେ ନିଉଛାଳି କରନ୍ତି । ୪ ।