(କବିସୂର୍ଯ୍ୟ— ରାଗ ରାମକେରୀ, ତାଳ ଆଡ଼ତାଳି)
ସଜ ହୋଇଥାରେ ଗଜରାଜ ଗତି ଆଜ
ରଜନୀ ଆସିବେ ସଜ ନୀଳୋତ୍ପଳ
ଶ୍ୟାମ ବ୍ରଜ ଯୁବରାଜ । ଘୋଷା ।
ସୁନା ଲତିକାରେ ମୀନା ପରି କଳା
ଝୀନ ଶାଢ଼ୀ ଯତ୍ନେ ପିନ୍ଧି
ବଳାପହ ମଣି ନୀଳ କୁନ୍ତଳରେ
କଳାପ କମର ବାନ୍ଧି । ୧ ।
ପୁଣ୍ଡରୀକବର ଯୁଗେ ଇନ୍ଦୀବର
ଯୁଗଳୀ ଲଢ଼ାଇବାକୁ
ମର୍ଦ୍ଦିବା ଲାଞ୍ଛନ ତାପିଞ୍ଛେ କନକ
ମଞ୍ଜରୀ ମିଳାଇବାକୁ । ୨ ।
ମସାରମଣି ହେମସାର ସମୂହ
ମିଶିବାର ବୁଝିବାକୁ
ବରତୁଳ ପୟୋଧରେ ରତିବର
ତୁଲେ ଥରେ ଯୁଝିବାକୁ । ୩ ।
କୁଞ୍ଜାଳୟ ଝଷଧ୍ୱଜ କେଳିରସ
ଭୁଞ୍ଜାଇ ଭୁଞ୍ଜିବୁ ପରା
କଞ୍ଜାୟତାକ୍ଷିରେ ଖଞ୍ଜାଇ ଲଲାମ
ତା ପରେ ପୁନ୍ନାଗ ଝରା । ୪ ।
ଦେଖି ସେ ଉତ୍ସବ ନେତ୍ରେ ଆମ୍ଭେମାନେ
ସୁଖୀ ହୋଇ ଜୀଇବାକୁ
ଦୁହେଁ ତ ଦୁହିଙ୍କ ଜୀବ ଜୀବ
-ବନ୍ଧୁ ଯିବ ମଧୁ ପିଇବାକୁ । ୫ ।
ଶୁଣି ଲଳିତାଙ୍କୁ ଲୀଳା ତାମରସ
ଉଞ୍ଚାଇଲେ ଦେବୀ ସ୍ନେହେ
ସେ ସମୟେ କରି ବନ୍ଦନାକୁ ହରି
-ଚନ୍ଦନ ଭୂନାଥ କହେ । ୬ ।