(ଦ୍ୱିଜ ପଦ୍ମନାଭ— ରାଗ ଝିଞ୍ଜୋଟି, ତାଳ ଝୁଲା)
ଯାର ଯାର ଗୁପତ କଥା
ତାର ତାର ସବୁ ସେହି ରେ । ଘୋଷା ।
ନିତି ଚାହୁଁଥିଲେ ତାହାର ମୁଖ
ହରୁଥାଇ ମନେ ସକଳ ଦୁଃଖ
ପାଦେ ପଡ଼ୁଥାଇ ସୁରପତି ସୁଖ
ଆନେ ମନ ନ ରୁଚଇ ରେ । ୧ ।
ହିତ ସୁରପତି ମଣଇ ଛାର
ତାହା ଦୁଃଖ ସୁଖ ମଣେ ତାହାର
ଅନ୍ତର ହେଲେ ସବୁ ଦିଗ ଦିଶଇ
ଶୋକ ସରିତେ ଭସାଇ ରେ । ୨ ।
ନୟନେ ନୟନ ପଡ଼ଇ ଯେବେ
ଅନୁରାଗ ରୀତି ବଢ଼ଇ ତେବେ
ଶୟନେ ସ୍ୱପନେ ମନ ନୟନକୁ
ତାହା ରସରେ ରସାଇ ରେ । ୩ ।
ବେନି ମାନସ ରସିଥାଇ ରସେ
ଚାହୁଁଥିଲେ ଘନରସ ବରଷେ
କହେ ପଦ୍ମନାଭ ବେନି ପରଭାବ
ମାରଶରେ ଭରସାଇ ରେ । ୪ ।