(ରାମକୃଷ୍ଣ କବିଚନ୍ଦ୍ର— ରାଗ କାମୋଦୀ, ତାଳ ଝୁଲା)
ନିଷେଧ କରୁଛି ଧନ ମନ ତହିଁ ମଜ୍ଜାନା ରେ
ପର ସଙ୍ଗେ ପ୍ରୀତି କରି ଜାତି କୁଳ ହଜାନା ରେ । ଘୋଷା ।
ହେବ କୁଳକୁ କଳଙ୍କ ହସିବେ ଜଗତ ଲୋକ
ଅପକୀରତି ଟମକ ନଗରେ ତୁ ବଜାନା ରେ । ୧ ।
କହୁଛି ରେ ସଖୀ ଘେନ କେବେ ନ ବଳାଅ ମନ
ଏବେ କହୁଅଛି ଘେନ ସେ ଅଟେ ନନ୍ଦକହ୍ନା ରେ । ୨ ।
ଦିନେ ଦେଖିଥିଲି ଡୋଳେ ସେ ଥିଲେ କଦମ୍ବ ମୂଳେ
ବଂଶୀ ସ୍ୱନେ ମୋର ଚିତ୍ତ ଚୋରାଇ ନେଲେ ସିନା ରେ । ୩ ।
ଭାଳି ନ ସରଇ ଦିନ ଦିନୁ ଦିନୁ ତନୁ କ୍ଷୀଣ
ରାମକୃଷ୍ଣ ବୋଲେ ହୀନ ମୁଁ ତୋର କିଣା ସିନା ରେ । ୪ ।