(ଗୌରଚରଣ— ରାଗ କାମୋଦୀ, ତାଳ ଏକତାଳି)
ନିଷେଧି ଥିଲି ପରା ପହିଲୁ ରେ
କାହିଁକି ତୁ ତେଣିକି ଚାହିଁଲୁ ରେ
ସେ ଯମୁନା ଅୟନ ଜଗୁଆଳୀ ନୟନ
କୁନ୍ତକୁ ବକ୍ଷ ଯା ପତାଇଲୁ ରେ । ଘୋଷା ।
ବିଷମ ବ୍ୟାଧି ଏବେ ଘୋଟିଗଲାଣି କେବେ
ନ ଭୋଗିବାର ଦଶା ପାଇଲୁ ରେ
କଳା ନାଗର ବିଷ ଘାରିବ ଅହର୍ନିଶ
ପୀୟୂଷ ମଣି ଯାହା ଖାଇଲୁ ରେ । ୧ ।
କେଉଁ ସାହସେ ଧନ ସମର୍ପି ଦେଲୁ ମନ
ଯୁବତୀ ସଂସାରେ କି ରହିଲୁ ରେ
ଏଥିକି ରସନିଧି ନାହିଁ ତ ମହୌଷଧି
ଜାଣି ଦୁଃସହ ତାପ ସହିଲୁ ରେ । ୨ ।
ତୋର ଏ ଅଭିଳାଷ ଥିଲା ଯେବେ ବାଳୀଶ
ଆଗରୁ ମୋତେ ଯା ନ କହିଲୁ ରେ
କି ବାଇଆଣୀ ରୀତି ଆଚରିଲୁ ଶ୍ରୀମତୀ
ଛାଏଁ ତ ନିନ୍ଦା ବୋଝ ବୋହିଲୁ ରେ । ୩ ।
ଅସରନ୍ତି ତୋ ଦିନ ହେବଟି ଏ ନିଦାନ
କେଉଁ କୁଳରେ ହାଦେ ନୋହିଲୁ ରେ
ଗାରିମା ଗିରିଧାରୀ ସାରି ଦେଇଛି ଠାରି
ବିରହାନଳେ ତନୁ ଦହିଲୁ ରେ । ୪ ।
ଦ୍ୱିଜ ଗଉର ବୋଲେ ଶ୍ୟାମ ଶୋଭା ସଲିଳେ
ନ ବିଚାରି ତ ଅବଗାହିଲୁ ରେ
ଏଣିକି ବିମ୍ବାଧରୀ ରହ କର୍ମ ଆଦରି
କେ କି କରିବ ଆପେ ଭ୍ୟାଇଲୁ ରେ । ୫ ।