(ଗୌରଚରଣ— ରାଗ କରୁଣାଶ୍ରୀ, ତାଳ ଆଠତାଳି)
ଜୀବନ ପ୍ରଦୀପ ହେଲା ଦପଦପ
ପ୍ରବେଶ ହୋଇଲା ଶେଷ ଯାମ
ଶ୍ରୀ ବଂଶୀବଦନ ଶ୍ରୀ ମଧୁସୂଦନ
ରଟ ରେ ରସନା ନୋହି ଭ୍ରମ । ଘୋଷା ।
ବୋଲ ବୋଲ କୃଷ୍ଣ କେଶବ ମୁରାରି
ହୃଷୀକେଶ ଦୀନବନ୍ଧୁ ଦଇତାରି
ନୃସିଂହ ବାମନ ଶଙ୍ଖଚକ୍ରଧାରୀ
ବଳିଧ୍ୱଂସୀ ରାମ ଘନଶ୍ୟାମ । ୧ ।
ବୋଲ ବାରମ୍ବାର ମାଧବ ମୁକୁନ୍ଦ
କେଶବ ଅଚ୍ୟୁତ ଶ୍ରୀ ସଚ୍ଚିଦାନନ୍ଦ
ଶ୍ରୀ ଗୋପୀଜନବଲ୍ଲଭ ଆଦିକନ୍ଦ
ବୈକୁଣ୍ଠ ଶ୍ରୀପତି ଅଭିରାମ । ୨ ।
ନିତ୍ୟ ନିରଞ୍ଜନ ସତ୍ୟ ସନାତନ
ଗୋବର୍ଦ୍ଧନ ଧାରୀ ଶ୍ରୀ ନନ୍ଦନନ୍ଦନ
କାଳୀୟ ଗଞ୍ଜନ ଯାମଳା ଭଞ୍ଜନ
ବୃନ୍ଦାବନଚନ୍ଦ୍ର କୋଟିକାମ । ୩ ।
ରସରାଜ ରସମୟ ରସିକେନ୍ଦ୍ର
ଗୋକୁଳକୁଳ କୁମୁଦ ପୂର୍ଣ୍ଣଚନ୍ଦ୍ର
ଦ୍ୱିଜ ଗୌର ମତି ପ୍ରମତ୍ତ ମିଳିନ୍ଦ
ଯୁଗ୍ମ ପଦେ ପୂର୍ଣ୍ଣ କରୁ କାମ । ୪ ।