(ଗୌରଚରଣ— ରାଗ କୁମ୍ଭକେଦାର, ତାଳ ଖେମଟା)
ଦେଖିବ ପରା ଆସ ଗୋ ମିତଣୀ
ମଦନ ମୋହନ ଲାବଣ୍ୟ ଠାଣି ଗୋ । ଘୋଷା ।
ଅନୁପମ ଚାରୁ ମୁରଲୀପାଣି
ବନୁ ଆସୁଛନ୍ତି ଗୋଧନ ଆଣି । ୧ ।
କି ମଞ୍ଜୁଳ ତାଙ୍କ ବାଙ୍କ ଚାହାଣୀ
ବିଲୋକି ପଥର ହୋଇବ ପାଣି । ୨ ।
ଖେମଟା ନାଟକୁ ଢମାଳି ବାଣୀ
ଭଲା ମାନୁଥାଇ ପଥରୁହାଣି । ୩ ।
ହାସ ଚନ୍ଦ୍ରହାସ କରି ଉଚାଣି
ସତୀ ଦମ୍ଭତରୁ ପକାନ୍ତି ହାଣି । ୪ ।
ଗୋକୁଳେ ଗୋକୁଳେ କାହାର ଆଣି
ଛଡ଼ାଇ ନ ଦେବେ କହ ସିହାଣୀ । ୫ ।
କେତେ ଶ୍ରମେ କେତେ ସୁରସ ଛାଣି
କେଉଁ ବିହି ଥିଲା କାହୁଁ ନିର୍ମାଣି । ୬ ।
ଗୌର ଦ୍ୱିଜ ବୋଲେ ନାହଁ କି ଜାଣି
ସେ ନାଗରମଣି ବିଶ୍ୱବିନ୍ଧାଣୀ । ୭ ।