(ବନମାଳୀ— ରାଗ କାଫି, ତାଳ ଖେମଟା)
ଶ୍ରୀ ରାଧା ସଙ୍ଗରେ ଶ୍ରୀ ହରି ରଙ୍ଗରେ
ହୋରି ଖେଳିଲେ ସୁଧାରେ । ଘୋଷା ।
ଶ୍ରୀ ପଦ ଗାନ କରେ କେ ତହିଁ ବସନ୍ତ ରାଗରେ
ମନ୍ଦ୍ର ମଧ୍ୟ ସୁତାନରେ
ତାତା ଥେଇ ଥେଇ ମୃଦଙ୍ଗ ବାଜଇ
ମନ୍ଦ୍ର ମଧ୍ୟ ଦ୍ରୁତ ମାନରେ । ୧ ।
ସଙ୍ଗିନୀ ରଙ୍ଗିନୀ ପୁରତେ ରହି ରହି
ତୁଙ୍ଗବିଦ୍ୟା ନାନା ବାଦ୍ୟେ
ମୋହିତ କରିବାରେ ଇନ୍ଦୁଲେଖା ମୁଖ
ଇନ୍ଦୁ ଢାଳି ନାଚେ ମଧ୍ୟେ । ୨ ।
ଦ୍ୱନ୍ଦ ଦ୍ୱନ୍ଦ ବୃନ୍ଦ ବୃନ୍ଦ ସୁନ୍ଦରୀ
ନନ୍ଦଲାଲଙ୍କୁ
ଚୂଆ ଚନ୍ଦନ ଅତର ପନୀର
ଅବିର ସଙ୍ଗେ ଗୁଲାଲକୁ । ୩ ।
କେ ଢାଳେ ବଳେ କେ ଛକେ କୁତୂହଳେ
ମୋହନ ମୁରଲୀ ଛଡ଼ାଇ
ଚଞ୍ଚଳେ ଅଞ୍ଚଳ ଧରି କହେ ବନମାଳୀ
କାହାକୁ ଧରନ୍ତି ଗୋଡ଼ାଇ । ୪ ।