(ବନମାଳୀ— ରାଗ ଶ୍ରୀ, ତାଳ ରୂପକ)
ଭଜରେ ମନ କାମମୋହନ
ଶ୍ୟାମସୁନ୍ଦର ନାମକୁ
ସଜବାଜ ହୋଇ ଲାଜ ଦୂରେ ଥୋଇ
ଚଳି ଯା ତୁ ବ୍ରଜଧାମକୁ । ଘୋଷା ।
ରଜନୀ ଦିବସେ ଏକାନ୍ତେ ବସି
ମଜ କୃଷ୍ଣ କଥାମୃତରେ ରସି
ସଜ କଞ୍ଜ ନେତ୍ର ଦର୍ଶନେ ପବିତ୍ର
ହୁଅ ପ୍ରତିଯାମ ଯାମକୁ । ୧ ।
ଅଜ ଶିବ ଶେଷ ବନ୍ଦେ ଯେ ପାଦେ
ଗଜଧ୍ୱଜ ଆଦି ତ୍ରିଦଶ ବୃନ୍ଦେ
ନଜର କର ତୁ କଜ୍ଜ୍ୱଳ କାଳିଆ
ଉଜ୍ଜ୍ୱଳ ମୂରତି କାମକୁ । ୨ ।
ଅଜଣା ଅଛି କି ଶ୍ରୀଗୁରୁ ବାଣୀ
ସଜଳ ନୟନେ ହୁଅ ତୁ ଗୁଣି
ସୁଜନମାନଙ୍କୁ ପୂଜ ଭକତିରେ
ବୁଝ ଧରମ ନିଷ୍କାମକୁ । ୩ ।
ଏ ଜନମ ବୃଥା ନ ଯାଉ ତୋର
ତେଜ ମୋହ ମାୟା ବିଷୟା ଘୋର
ହେଜ ବନମାଳୀ ବ୍ୟାଜରେ ନ ଭାଳି
ନ ଯା ତପନଜ ଗ୍ରାମକୁ । ୪ ।