(ଦୀନବନ୍ଧୁରାଜ— ରାଗ ମୋହନ କେଦାର)
ମଧୁ ଋତୁ ସଙ୍ଗରେ ବିଜେ
ରାଜ ରାଜ ଅନଙ୍ଗ
ମଲ୍ଲୀ କୋରକ ଶଙ୍ଖ ଧରି କରେ
ନାଦ ମାଳିକ ଭୃଙ୍ଗ । ଘୋଷା ।
ମନ୍ଦ ପବନ ଗୁରୁରେ ପ୍ରେରିତ
କୁସୁମ ଭୂଷଣ ଗଣେ ସୁଭୂଷିତ
ବଲ୍ଲୀ କାମିନୀ ନାଚେ ଅବିରତ
ହୋଇ ହରଷିତ ଅଙ୍ଗ । ୧ ।
ମତ୍ତ କୋକିଳ ଡିଣ୍ଡିମ
ପକ୍ଷୀକୁଳ ରବ ବାଦ୍ୟ ମନୋରମ
ନାଗକେଶର ପଲ୍ଲବ ଧ୍ୱଜ
ବୃନ୍ଦ ଶୋଭଇ ତୁଙ୍ଗ । ୨ ।
ଚାରୁ କେତକୀ କୁନ୍ତ ମଧୁକର
ପନ୍ତି ମଞ୍ଜୁଳ କାନ୍ତି ଅସିବର
କୁସୁମେ ମଣ୍ଡିତ ଅଶୋକ ତରୁକୁଳ
ଚାରୁ ଚିତ୍ତ ସତାଙ୍ଗ । ୩ ।
ମାଧବୀ ସୁନିଆଳି ସେବତୀ
କୁନ୍ଦ ଚମ୍ପକ ସୈନ୍ୟ ବିଳସତି
କି ଏ ତରୁଣ ତମାଳ ତରୁବର
ବାର ମତ୍ତ ମାତଙ୍ଗ । ୪ ।
କହଇ ଦୀନବନ୍ଧୁ ହରିଚନ୍ଦନ
ଧନ୍ୟ ଏହୁ ଋତୁରାଜ ଶୋଭନ
ରଚିଲେ ଯହିଁ ବ୍ରଜ କାମିନୀ
ଘେନି ହୋରି ତରଙ୍ଗ । ୫ ।