(ବିକ୍ରମଦେବ ବର୍ମ୍ମା— ରାଗ କୁମ୍ଭକାମୋଦୀ, ତାଳ ଆଦିତାଳ)
ବାଳାମଣି ମୁଁ କରି ନାହିଁ ଦୋଷ
ଅକାରଣେ କିମ୍ପା ବହିଛୁ ରୋଷ
ବୃଷଭାନୁ ତନୟା ହେଲେ ନିର୍ଦ୍ଦୟ ହିଆ
ବିରହାନଳେ ମୁଁ ଗଲିଟି ନାଶ । ଘୋଷା ।
ଗତ ରାତ୍ରରେ ଆସୁଁ ତୁମ୍ଭ ପାଶ
ନିକୁଞ୍ଜ ପଥୁଁ ମୋତେ ନୀଳବାସ
ସଖାଗଣ ସଙ୍ଗରେ ଖେଳିବାକୁ ରଙ୍ଗରେ
ବଳେ ନେଇ କଲେ ଏ ନାରୀ ବେଶ । ୧ ।
ତରଣି ତନୟା ତଟେ ମହେଶ
ପ୍ରିୟା ପୂଜୁଁ ହେବାରୁ ନିଶି ଶେଷ
ସଖାଗଣକୁ ଛାଡ଼ି ଆସିଲି ମୁଁ ଦଉଡ଼ି
ହୋଇଣ ଶଙ୍କା ପଙ୍କିଳ ମାନସ । ୨ ।
ହେଠ କର କିମ୍ପା ମୁଖ ସାରସ
କଟୁ ବାଣୀଗଣ କାହିଁକି ଭାଷ
ଶ୍ରୀ ବିକ୍ରମ ବନ୍ଦିନୀ ରାସ ବିନୋଦିନୀ
ତରେ କୋଳ କରି ଦାସକୁ ତୋଷ । ୩ ।