(କବିଚନ୍ଦ୍ର କାଳୀଚରଣ— ରାଗ ସେନା, ତାଳ ଆଠତାଳି)
ଜାଣି ନଥିଲି ସଜନୀ ଦରହାସ କିସ ବୋଲି
ଶିଖି ନଥିଲି ସଜନୀ ଅଳସୀ ମରାଳୀ ଚାଲି । ଘୋଷା ।
ଢଳା ଅନାଉଣି ସତେ ଜଣା ତ ନଥିଲା ମୋତେ
ରଦନେ ପଣନ୍ତ ଭିଡ଼ା ଶିଖିଲି ମୁଁ ପରା କାଲି । ୧ ।
ମନ କଥା କେବେ ସହି ଆଖିରେ ନଥିଲି କହି
କି କରିରେ ନ ପଢ଼ି ସେ ପାଠ ପାଟ ଚାଟ ହେଲି । ୨ ।
ଦମଦମ ହେବା ଛାତି ଘୁମ ଭୁଲା ମଧୁରାତି
ଛାଇ ଦେଖି ବାଇ ହେବା ଆଗେ ତ ବାରି ନଥିଲି । ୩ ।
କବିଚନ୍ଦ୍ର କହେ ଧନ ଅତନୁରେ ଗୁରୁ ମାନ
ଆହୁରି ଯା ଅଛି ବାକି ବଢ଼ାଇ ଦେବ ସେ ବେଲି । ୪ ।