(କିଶୋରଚନ୍ଦ୍ର— ରାଗ ଝିଞ୍ଜୋଟି, ତାଳ ଅଟ୍ଟତାଳ)
ଏହି କି ମୋ କଣ୍ଠତଟ ରତନହାରା ରେ । ଘୋଷା ।
ନୂତନ ମତ୍ତକାଶିନୀ ସମାଜ
ମସ୍ତକ ଚମ୍ପକଝରା ରେ
ତ୍ରିଲୋକ ସାର ଶୋଭା ସମ୍ଭାର
କେଳିକାରା ରେ । ୧ ।
ଆସଇ ମନ୍ଦ ଗତି କରି ଆଳି
କରେ ଦେଇ କର ଭରା ରେ
ପଙ୍କଜ ପାଦ ହଂସକ ନାଦ
ଜ୍ଞାନହରା ରେ । ୨ ।
କୁନ୍ଦ ସୁନ୍ଦରତର ଦରହାସ
ଅପୂର୍ବ ପୀୟୂଷ ଧାରା ରେ
ମିଶାଇ ଯୋଷା ହୀରା ବରଷା
କରେ ଧରାରେ । ୩ ।
ଅଙ୍ଗ ସମ୍ଭୂତ ପରିମଳ କରେ
ଭୃଙ୍ଗକୁ ସମ୍ଭ୍ରମେ ତ୍ୱରାରେ
କି ଭଙ୍ଗିମାରେ ଶୁଭାଙ୍ଗୀ ମାରେ
ନେତ୍ର ଛୁରା ରେ । ୪ ।
ଏକାଳେ ପାଶ ସଜନୀକି ରାଧା
ଭାଷ ପ୍ରକାଶିଲେ ଧୀରାରେ
କିଶୋରଚନ୍ଦ୍ର ଭାଷେ ରାଜେନ୍ଦ୍ର
ନୃପ ହୀରା ରେ । ୫ ।