(କାର୍ତ୍ତିକ)
ନବ ନବୀନା ଗୋ ଲାଜ କରୁଅଛୁ କେତେ
ଟେକ ଟେକ ଧନ ଚାରୁ ଚନ୍ଦ୍ରାନନ
ଜଣାଉଛି ଘେନ ଏତେ । ଘୋଷା ।
କେ କିସ ଲଗାଇ କହିଛିରେ ସହି
ଋଷିମୋହିନୀ ମୋ ନାଁରେ
ସେଥି ପାଇଁ ବାଳୀ ମନେ ବହି ଛଳି
କରୁଣା ଊଣା ମୋଠାରେ । ୧ ।
ମହୀକି ଅନାଇ ବସିଛୁ ଘୁମାଇ
ନଖେ ଚିରୁଛୁ ଅବନୀ
ମାନିନୀ ମନରୁ ମାନ ଦୂର କର
ଶରଦ ଚନ୍ଦ୍ରବଦନୀ । ୨ ।
ଆସିଣ ଅଙ୍କ ପଲଙ୍କ ମଣ୍ଡ ସୁଖେ
ଗଳେ ହୁଅ ଗଳାହାର
ଗଳାହାର କାହିଁ ଗଳକୁ କାଟଇ
ଏହା ନ ଭାବ ମନର । ୩ ।
ଜଳ ତେଜି ଯାଇ ମୀନ କି ବଞ୍ଚଇ
ବଞ୍ଚଇ ନବୀନା ନ ଭାବ ମନେ
କହେ ଦୀନ ହୀନ କାର୍ତ୍ତିକ ତୋହର
ଏହା ରଖିଥିବୁ ମନେ । ୪ ।