(ରଘୁନାଥ— ରାଗ ଆଶାବରୀ, ତାଳ ଆଡ଼ତାଳି)
ନ କହିଲେ ପଦେ ନିପଟ ବିପଦେ
ନିକର ବୁଡ଼ାଇ ଦେବୁ ସିନା ଗୋ । ଘୋଷା ।
ନ ଜାଣି ଜାଣିବା ଦୋଷ ହେଲେ ସେବା
ନ କରିବ କ୍ଷମା ଯଦି ନବୀନା ରେ
ବୁଝାମଣା ହେଲେ ଊଣା ବୋଲିବେ
ଲୋକେ କେତେ ଭାବନା ରେ । ୧ ।
ତୁ ତାର ସଜନୀ ମୁଁ ତୋର ଭଜନୀ
ତୋ ଚିତ୍ତେ କରୁଣା କରୁ କି ନା ଗୋ
ସେ ତ ଦୟାବତୀକି ଘେନ ବିନତି
ବୋଲିବୁ ଗତି ନାହିଁ ତୋ ବିନା ରେ । ୨ ।
କୁଞ୍ଜରେ ବସିଛି ତୋ ବାଟ ଚାହୁଁଛି
ନ କହିଲେ ତୁ ମୋ ନିବେଦନା ରେ
କୁଞ୍ଜରଗତି ହେଜ ମିଥ୍ୟା ମନୁ ହେ ଆଜ
ଯମୁନାରେ ଝାସ ଦେବି ତୋ ନାଁ ରେ । ୩ ।
କହେ ରଘୁନାଥ କବି ନିଶାନାଥ
ମୋହନ ନିଷ୍ଠୁର ଜଳପନାରେ
କହିଲେ ସଜନୀ ଆଣିବି ରଜନୀ
କହି ବିନୟନୟ କଳପନାରେ । ୪ ।