(ସୋମନାଥ ସିଂହ)
ନାଗର ମୋହନ ରୂପ ମୋହିଲା ରେ
ମୋହିଲା କ୍ଷଣି ଅତନୁ ଦହିଲା ରେ
ଥରଥର କରି ଦେଲା ଦହି ଝରଝର ନେତ୍ରୁ ନୀର ବହି
ମାର ମାରଣ ତ କହି ନୋହିଲା ରେ । ଘୋଷା ।
ସଦନେ ରହି ନୁହଇ ଅନୁକ୍ଷଣେ
ଚିତ୍ତ ବିଚଳିତ ହୁଏ ତାହା ଘେନି
ରସେ ରସିବାକୁ ଚିତ୍ତ ହୁଅଇ ଅନବରତ
ନ ରଖେ ଦୂତ ବରତ କି ହେଲା ରେ । ୧ ।
ଦମ୍ଭ ଜୀବ ବିବେକ ପାଶୋରାଇ
ଅଧିକେ ଲୋଭ ଯତନେ ପଲ୍ଲବାଇ
ପାରିବ କେ ଏହା ସହି ସହିଲେ ନ ରହେ ରହି
ଆଉ କାହିଁ ଏ ତ ଦେଖା ନୋହିଲା ରେ । ୩ ।
ବିଷମ ହେଲାଣି ଦଶାର ସାଗରେ
ମୋହର ଜ୍ଞାନ ଉଡ଼ୁଛି ସନ୍ତାପରେ
ଥିଲା ଏତେ କାଳେ ଏହା କହିଲେ କମ୍ପୁଛି ହିଆ
ଆନ କେହି ନାହିଁ ସାହା କହିଲା ରେ । ୪ ।
ପରମାଦ ପୀରତିକି କରେ ଭୀତି
ଏବେ ହେଲାଣି ନିକର ସେହି ଗତି
କି କରିବି କରେ ମୋହ ଥିଲେ କି ଉପାୟ କହ
ଏବେ ବହୁତ ସନ୍ଦେହ ଲାଗିଲା ରେ । ୫ ।
ଜଣାଗଲାଣି ଏଥର ବଞ୍ଚି ନୋହେ
ଜାଣ ବୁଡ଼ିବି ନିଶ୍ଚୟ ତାଙ୍କ ସ୍ନେହେ
ଏଣିକି ନାହିଁ ବିଚାର ମୋହିଲେ ଶ୍ୟାମସୁନ୍ଦର
ସୋମନାଥ ବୀରବର ଭାଷିଲା ରେ । ୬ ।