(ସୋମନାଥ ସିଂହ— ରାଗ ଶଙ୍କରାଭରଣ, ତାଳ ଏକତାଳି)
ଛାଡ଼ ହେ ପାଣି ଜାଣିଥିଲା କେ ଏହା
ପାଷାଣରୁ କର୍କଶ ପୁରୁଷଙ୍କ ମାନସ । ଘୋଷା ।
ଯାଇ ଦୂର ବିଦେଶେ ଥାଇ ହରଷେ
ନାହିଁ ଏ ଜ୍ଞାନ ଲେଶେ
ଶିରୀଷ ସୁକୋମଳା ସ୍ୱଭାବେ ଯେ ଅବଳା
ସେ ପୁଣି ଅବହେଳା କୁଳିଶେ ହେବ ଦଳା । ୧ ।
ଯା ବିନୟ ବଚନେ ଶୁଣଇ କାନେ
ତାକୁ ମାର ଜୀବନେ
ଯେହି ଏଡ଼େ ଦାରୁଣ ସେହି ମନ୍ମଥ ବାଣ
ବିହି ଯହିଁ କଷଣ କେହି ରହିବ ପ୍ରାଣ । ୨ ।
କହଇ ସୋମନାଥ କି ମନୋରଥ
ଭାଳି କହ ହେ ନାଥ
ଉଠ ନ କର ମଠ ଶଠ ଚାଟ ନ ଗଠ
ପଠନେ ହେବ କାଠ ମୋ ସେ ବିରହ ପାଠ । ୩ ।