(କବିସୂର୍ଯ୍ୟ— ରାଗ ଚୋଖି, ତାଳ ଏକତାଳି)
Also sung in Kumbha Kamodi
କୁମ୍ଭକାମୋଦୀ ରାଗରେ ମଧ୍ୟ ବୋଲାଯାଏ
Ṅa Patala — Kisorachandrananda Champu
ଙ ପଟଳ — କିଶୋରଚନ୍ଦ୍ରାନନ୍ଦ ଚମ୍ପୂ
ନୂଆ ନଟ ପଟଳୀ ମୁକୁଟ ହେ
ନାହିଁ କି ଶ୍ରୀଅଙ୍ଗ ସୁଖ
ନିପଟ ନିସ୍ତେଜ ଦିଶୁଛି ତ ଆଜ
ନିରଳସ ଚନ୍ଦ୍ରମୁଖ । ଘୋଷା ।
ନୀଳୋତ୍ପଳ ବାସି ହେଲା ପରି ଦିଶି
ଯାଉଛି ଦୂରୁ ଶ୍ରୀଅଙ୍ଗ
ନାସା ନୀଳ ତିଳ ଫୁଲରୁ ଅନିଳ
ପ୍ରସରୁଛି ବେଗ ବେଗ । ୧ ।
ନୀପ ଉପବନ ନିକଟ ପବନ
ସ୍ପରଶରୁ ଯେବେ ଡର
ନଦୀକୂଳସ୍ଥଳ ଏ ବଡ଼ ଶୀତଳ
ନୁହନ୍ତାଟିକି ବିହାର । ୨ ।
ନିଦ ନାହିଁ କି ନୟନେ ନିଶି ଦିନ
ଆହା ମରଇ ମୋ ଧନ
ନବନୀତ ତହୁଁ ମୃଦୁ ଦେହେ କାହୁଁ
ସମ୍ଭବିଲା ଏ କଦନ । ୩ ।
ନବ ହେମଦ୍ୟୁତି ଅମରୀଏ ନିତି
ନିଅନ୍ତି ଫୁଲ ଏ ବନୁ
ନେତ୍ର ପଥେ ପଡ଼ିଗଲେ କି ସେ ଛାଡ଼ି
ଯାଉ ନାହିଁ ଜ୍ୱର ମନୁ । ୪ ।
ନ ବିହର ଗୋପ ସଙ୍ଖାଳି ଏ ପାପ
ଗହନରେ କିଛି ଦିନ
ନରେଶ ମଣ୍ଡନ ଶ୍ରୀ ହରିଚନ୍ଦନ
ଜଗଦ୍ଦେବ ସ୍ତବ ଘେନ । ୫ ।