(କବିସୂର୍ଯ୍ୟ— ରାଗ ଚନ୍ଦ୍ରକାନ୍ତ, ତାଳ ଯତି)
Ha Patala — Kisorachandrananda Champu
ହ ପଟଳ — କିଶୋରଚନ୍ଦ୍ରାନନ୍ଦ ଚମ୍ପୂ
ହରି ଆମ୍ଭର ଏ ତ ପ୍ରାଣର ଧନ । ଘୋଷା ।
ହରିହୟ ମଣିକି ଜିଣିଛି ଅପଘନ
ନିନ୍ଦୁଅଛି ଇନ୍ଦୁକୁ ବଦନ ଗୋ । ୧ ।
ହଜାର ସଂଖ୍ୟକ ହେଲେ ହେଲେହେଁ ମଦନ
ନୋହିବ ଏ ମୋହନ ସମାନ ଗୋ । ୨ ।
ହଜି ନ ଯିବ ଜୀମୂତ କେଶାର କି ଜ୍ଞାନ
ଶୁଣୁ ଶୁଣୁ ମୃଦୁ ବେଣୁଗାନ ଗୋ । ୩ ।
ହଟି ଥରେ କରିବା କି ରଦାମ୍ବର ପାନ
ହେଉ ଫଳବନ୍ତ ଯଉବନ ଗୋ । ୪ ।
ହାର ମଧ୍ୟରେ ଆମ୍ଭ ତରଳ ରତନ ଗୋ
ହେବେ କି ଏ ଯୁବତୀ ଜୀବନ ଗୋ । ୫ ।
ହୃଷ୍ଟ ହୋଇ ଅଷ୍ଟଦୁର୍ଗ ନମୁଚି ସୂଦନ ଗୋ
କରେ ଏ ରସରେ ବିରଚନ ଗୋ । ୬ ।