(ଗୋପାଳକୃଷ୍ଣ— ରାଗ ଭୈରବୀ, ତାଳ ରୂପକ)
ଧୀର ସମୀରେ ବସି ଡାକୁଛି ତୋ ନାଁ ରେ । ଘୋଷା ।
ପ୍ରାଣେଶ୍ୱରୀ ରାଧିକେ ଶ୍ରୀମତୀ ଗାନ୍ଧର୍ବିକେ
ବୋଲୁ ହଜିଯାଉଛି ତୋ ଚେତନା ରେ । ୧ ।
ବନେ ପ୍ରତି ବଲ୍ଲୀକି ଧେନୁ ପଶୁ ପକ୍ଷୀକି
ତୋ ଅଭିଧାନରେ କରି କଳ୍ପନା ରେ । ୨ ।
ତୋଳି କୁସୁମ ବାଳା ତୋ ବେଶ ପାଇଁ ମାଳା
ଗୁନ୍ଥି ସେ ରଖୁଛି ଚନ୍ଦ୍ରବଦନା ରେ । ୩ ।
ଧ୍ୟାନ କରୁ ତୋ ରୂପ ବହେ ଲୁହ ଅମାପ
ଦ୍ୱିଗୁଣେ ବୃଦ୍ଧି ହେଲାନି ଯମୁନା ରେ । ୪ ।
ତୋ ଦୋଷ ବୁଝାମଣା କରି ଛାମୁକୁ ଅଣା
ଦଣ୍ଡ ଦିଅ ପଛକେ ତୁ ରୁଷନା ରେ । ୫ ।
ଗୋପାଳକୃଷ୍ଣ ବୋଲେ ସେହି ସଜେ ଚଳିଲେ
ପଥେ ସହୀ କହେ ଶୁଣ ସୁମନା ରେ । ୬ ।