(ଗୋପାଳକୃଷ୍ଣ— ରାଗ ବାଗେଶ୍ରୀ, ତାଳ ଏକତାଳି)
ଯେତେ କହିଲେ ତୋତେ କିଶୋରୀ ମଣି
ପ୍ରତେ ନ କରି ବୋଇଲୁ ଯେ କେ ଜାଣି । ଘୋଷା ।
ସର୍ବଦା ସୁପ୍ରସନ୍ନ ସଜ କଞ୍ଜ ଲପନ
ଶୁଖାଇ ନୟନରୁ ପୋଛିଲୁ ପାଣି । ୧ ।
ସୁନ୍ଦର ପୁରନ୍ଦର ମୁକୁଟ ଅଳଙ୍କାର
ହେଲେ କି ପଦେ ସତ ନାହିଁ ତା ବାଣୀ । ୨ ।
ଅଦ୍ୱିତୀୟ ବିଦଗ୍ଧ ଧୀର ଶୀଳ ସୁସ୍ନିଗ୍ଧ
ହୋଇ କି ହେବ ଜାର ବର ଅଗ୍ରଣୀ । ୩ ।
ଆଉ ସେ ପରସଙ୍ଗ ବୋଲି ଦମ୍ଭରେ ଅଙ୍ଗ
ଭାଙ୍ଗି ଦେଲୁ ନାହୁଁ କି ଜୃମ୍ଭାକୁ ଆଣି । ୪ ।
ମନକୁ ନ ଆସିଲେ ଅସାର ଭଲ ହେଲେ
ବୋଲୁ ଉଠିଗଲୁ ରେ ପ୍ରାଣ ମିତଣୀ । ୫ ।
ଆସ ଆସ ଉଛୁର ହେଲାନି ଅଭିସାର
କାଳ ଆଗ ସଜାଡ଼ିଦେବି ମୁଁ ବେଣୀ । ୬ ।
ହେଲାନି ହେଲା କଥା ହୋଇବ କି ଅନ୍ୟଥା
ଗୋପାଳକୃଷ୍ଣ ଶ୍ରୀ ଲଳିତାଙ୍କୁ ଭଣି । ୭ ।