(ଗୋପାଳକୃଷ୍ଣ— ରାଗ ମିଶ୍ରମୁଖାରୀ, ତାଳ ଖେମଟା)
ବାଉନି ବାଉନି ରେ ଗୁଣ ମଉନି ହେଲେଣି ମା
ଲୋଟୁଛନ୍ତି କଳିନ୍ଦଜା ତୀର
ଫୁଲବନୀ ଅବନୀରେ । ଘୋଷା ।
ସୁମରି ସୁମରି ହରି
ଜାଣ ତୋ ସୁଷମା ଶ୍ରୀ କିଶୋରୀ
ଗାଉଥିଲେ ଗୀତ କରି
ଧରି ବୀଣା ପ୍ରାଣ ସଙ୍ଗିନୀ ରେ । ୧ ।
ପ୍ରସାରି କର ସାରିକି
ବସାଇ ଧୀରେ ଗୋ ସ୍ୱାମିନୀକି
ଡାକ ଆସିବେ ଏଣିକି
ବୋଲୁ ନେତ୍ର ଥନଥନ ନୀରେ । ୨ ।
ଆସୁଥିବୁ ପରା ବୋଲି
ଘଡ଼ି ଘଡ଼ିକି ନବ ଛଇଳୀ
ତୋଳି ସଘନେ ଭ୍ରୂବଲ୍ଲୀ
ଚାହୁଁଥିଲେ ଚନ୍ଦ୍ରବଦନୀ ରେ । ୩ ।
ଶ୍ୟାମ କରିବାର ଦୋଷ
ସହୀ ମୋହର ହେଲା ଗୋ ଆସ
ହୁଅ କି ନ ହୁଅ ବେଶ
ବ୍ରଜ ଯୋଷା ଶିରମଣ୍ଡନୀ ରେ । ୪ ।
ନଖରୁ ଶିଖ ପର୍ଯ୍ୟନ୍ତେ
ଆଳୀ ସାଜିଲେ ବେଶ ତ୍ୱରିତେ
ଗୋପାଳକୃଷ୍ଣ ପୁରତେ
ଘେନିଗଲା ଲାଗ ବର୍ତ୍ତନୀ ରେ । ୫ ।