(ଗୋପାଳକୃଷ୍ଣ— ରାଗ କୀରବାଣୀ, ତାଳ ଏକତାଳି)
ତୋତେ କହିଲା ପରି ମୋତେ ଚରମ କରି
ମରମ ବିଦାରି ପକାଇଲା ରେ । ଘୋଷା ।
ବାଟ ପାଶୋରିଲୁ ପରା ଯେ ଅଇଲୁ
କେତେ ଦିନକୁ ଦୟା ହୋଇଲା ରେ । ୧ ।
କରାଇଛି ବ୍ରତ ଆଜ ପୁରୋହିତ
ପୁରୁଷକୁ ଅନାନା ବୋଇଲା ରେ । ୨ ।
ତୁ ଭାଷନ୍ତେ ଧୀରେ କଥା ହେଲେ ଥରେ
ନିଷେଧି ମଥା ତ କମ୍ପାଇଲା ରେ । ୩ ।
ମୋହନଙ୍କୁ ଚାହିଁ ଚାହିଁବି ତ ନାହିଁ
ତୋ ମୁଖେ ଯାଆନ୍ତୁ ବୋଇଲା ରେ । ୪ ।
କୁଶଳ କି ମିତ ତୁମ୍ଭର ଯାବନ୍ତ
ସଂଖୁଳିଲା ଆଗହୁଁ ଛଇଳା ରେ । ୫ ।
ଗୋପାଳକୃଷ୍ଣ ସେ ବାଣୀ ଶୁଣି ଭାଷେ
ଆପଣ ରୀତିକି ଯୋଗାଇଲା ରେ । ୬ ।