(ଗୋପାଳକୃଷ୍ଣ— ରାଗ ମୋହନା, ତାଳ ରୂପକ)
ମୋ ଜୀବର ଜୀବନ
କାହିଁକି ଆଜ ସଜ ସରସିଜ
ମୁଖ କରିଛନ୍ତି ମ୍ଳାନ ମିତଣୀ ରେ । ଘୋଷା ।
ଲେଉଟାଇ ଗୋଧନ
ଆସୁ ସଦନକୁ ସବୁ ଦିନ ପରି
ଶୁଭୁ ନାହିଁ ବଂଶୀ ସ୍ୱନ । ୧ ।
ଆରାଧି ବିକର୍ତ୍ତନ
ଆସିଲା ବେଳେ ହସି ହସି ଯାଚି
ଦେଇ ଅଇଲି ଚୁମ୍ବନ । ୨ ।
ପର୍ଣ୍ଣ ସହ ପ୍ରସୂନ
କର୍ଣ୍ଣରେ ମୋର କରି ଅବତଂସ
ଚଳିଗଲେନି ବହନ । ୩ ।
ମୋ ଆନଟି ମୁଁ ମାନ
କରି ନାହିଁ ଚନ୍ଦ୍ରାବଳୀ ମନେ ରହି
ଥିବ ପରାଟି ଗୁମାନ । ୪ ।
ତେଜି ବ୍ରଜ ସଦନ
ଗେହପତି ମଥୁରାକୁ ଯିବା କଥା
କଲେ କି ଅନୁସନ୍ଧାନ । ୫ ।
ଗୋପାଳକୃଷ୍ଣ କଥନ
ପୌର୍ଣ୍ଣମାସୀ ଆସି ତା ଯାକ ନିଷେଧି
କଲେନି ତ ସମାଧାନ । ୬ ।