(ଗୋପାଳକୃଷ୍ଣ— ରାଗ ଆନନ୍ଦଭୈରବୀ, ତାଳ ଏକତାଳି)
ମୋତେ ଲଗାନା ରେ ବ୍ରଜବିଧୁ ଲଟ
ତୃଣରୁ ତୁଚ୍ଛ ଜଟିଳା କରିବ ନିପଟ । ଘୋଷା ।
ଥରେ ହେଲେ ସ୍ୱଚ୍ଛ କରି ବିଲୋକି ନାହିଁ ମୁଁ ଡରି
କଳା କି ଗୋରା ସେ ନବ ଶିଖଣ୍ଡ ମୁକୁଟ । ୧ ।
ଅତି ମନ୍ଦ ମୋ ନଣନ୍ଦ ଜିଣିଲା କ୍ଷଣି ଅଳିନ୍ଦ
ସକ୍ରୋଧ ହୋଇ ବଦନ କରୁଛି ବିକଟ । ୨ ।
କାଲି ଗୋଷ୍ଠ ପ୍ରାଙ୍ଗଣରେ ବୃଦ୍ଧ ଆଭୀର ସଭାର
ଚନ୍ଦ୍ରାବଳୀର ଚରିତ ବସିଥିଲା ହାଟ । ୩ ।
ଚାଲୁ ପାଦ କଣ୍ଟି କଣ୍ଟି ପଡ଼ୁଛି ନାନା ଅରଷ୍ଟି
ତୁଚ୍ଛାକୁ ଲୋକ ତରକି ବାନ୍ଧୁଛନ୍ତି ବାଟ । ୪ ।
କୃଷ୍ଣ ଲାଗି ମାଳା ଦେଇ ଗୋପାଳକୃଷ୍ଣ କହଇ
ଆନ ଦେଇଛନ୍ତି କିଳି ନ ଥାଅ କବାଟ । ୫ ।