(ଟଙ୍କଧର)
ଉଠ ବାବୁ ପାଇଲା (ପାହିଲା) ଶର୍ବରୀ
ହେ ବଂଶୀଧାରୀ । ଘୋଷା ।
ଦାମ ସୁଦାମ ସୁବଳ ସୁବାହୁ ମଧୁମଙ୍ଗଳ
ଆବର ଯେ କାମପାଳ ଆସି ସଙ୍ଗ ବ୍ରଜବାଳ
ଡାକୁଛନ୍ତି ତୁମ୍ଭ ନାମ ଧରି ହେ । ୧ ।
କ୍ଷୁଧାରେ ହୋଇ ଆକୁଳ ବାଧାରେ ଧେନୁ ସକଳ
ନ ପାଇଣ ଜଳ ସ୍ଥଳ ହୁଅନ୍ତି ଅତି ବିକଳ
ଯିବୁ ପରା ଚରାଇ ବାଛୁରୀ ହେ । ୨ ।
ଦିଗ ତ ଦିଶେ ନିର୍ମଳ ରଙ୍ଗିମା ନଭମଣ୍ଡଳ
ଘେନି ପୁଷ୍ପ ପରିମଳ ବହଇ ମନ୍ଦ ଅନିଳ
ଭ୍ରମିଲେଣି ଭୃଙ୍ଗ ଧ୍ୱନି କରି ହେ । ୩ ।
ପୂର୍ବ ଦିଗେ ଦିନମଣି ଉଦୟ ହେବେ ଏକ୍ଷଣି
କାକ କୁକ୍କୁଟଙ୍କ ବାଣୀ ଶୁଣି ଶୀଘ୍ରେ ଦ୍ୱିଜଶ୍ରେଣୀ
ବାହୁଡ଼ିଲେ ଶୌଚ କର୍ମ ସାରି ହେ । ୪ ।
ଗଙ୍ଗବଂଶ କ୍ଷୀରାର୍ଣ୍ଣବ ଚନ୍ଦ୍ର କୃଷ୍ଣଚନ୍ଦ୍ର ଦେବ
ସେବି ଚରଣ ରାଜୀବ ଅପହୁଡ଼ କରି ଜବ
ପ୍ରକାଶିଲେ ଏ ରସ ବିସ୍ତାର ହେ ସାଧୁ ଜନେ । ୫ ।