(ଗୌରଚରଣ— ରାଗ ଶୋକ କାମୋଦୀ)
ଚନ୍ଦ୍ରାବଳୀ ଉକ୍ତି
କି କଲି ଆଜ କି ହୁଡ଼ା ହୁଡ଼ିଲିଟି
ଜାଣିଯା ଜହର ଖାଇ ଲୋଡ଼ିଲିଟି । ଘୋଷା ।
କାହାକୁ କହିବି କି ଏ ମୋର ଅର୍ଜିଲା ଦୋଷ
ଧୀବର ବଚନ ଜାଲେ ପଡ଼ିଲିଟି । ୧ ।
ବିକା ନ ଗଲେ ଏ ଦଧି ନ ଥିଲା ମୋର କି ନିଧି
ସନ୍ତାପ ସରିତେ ପଡ଼ି ସଢ଼ିଲିଟି । ୨ ।
କଲି କି ମନ୍ଦ କରମ ହେଲି ମୁଁ ଅତି ଭରମ
କୈବର୍ତ୍ତ କୂଟ କୁଣ୍ଡରେ ପଡ଼ିଲିଟି । ୩ ।
ଶମନ ଭଗିନୀ ସେହି ତାହାକୁ ନ ଡରି ମୁହିଁ
କାଳ ସଙ୍ଗେ ବାଳ ଧରି ଲଢ଼ିଲିଟି । ୪ ।
କୁଳ ମହତ ଛାଡ଼ିଲି ଐଶ୍ୱର୍ଯ୍ୟ ମୁଁ ତ ଏଡ଼ିଲି
ନିଜାଙ୍ଗୁଳିରେ ନୟନ ତାଡ଼ିଲିଟି । ୫ ।
ଏ ଜୀବନ ଯିବା ପାଇଁ ଶୋଚନା ମୋହର ନାହିଁ
ସଖୀମାନଙ୍କ ସଙ୍ଗ ଯା ଛାଡ଼ିଲିଟି । ୬ ।
ଗୌର ଦ୍ୱିଜ ବୋଲେ ହରି ଏଥିରୁ ନ କଲେ ପାରି
ନିଶ୍ଚୟ ନଦୀ ମଧ୍ୟରେ ବୁଡ଼ିଲିଟି । ୭ ।