(ଗୋରେଖ ଦାସ— ଖେମଟା)
ମନ ଭ୍ରମରା ରେ ଏ ଫୁଲରେ ନାହିଁ ବାସ
କାହିଁ ପାଇଁ ତୁହି ବାଇ ହୋଇଅଛୁ
ତୁହି ପାଇବୁ କି ଯଶ । ଘୋଷା ।
ଫୁଟି ମଲ୍ଲୀ ଚମ୍ପା ଚହଟି ଗଲାଣି
ବାସି ହୋଇଲାଣି ବାସ
ବାରବାର ତୋତେ ମନା କରୁଅଛି
ପାଇବୁଟି ଅପଯଶ । ୧ ।
ପର୍ବତ ଶିଖରେ ପଦ୍ମ ଫୁଟିଅଛି
ଓଲଟି ରହିଛି ପୁଷ୍ପ
ଯେବେ ତୁ ପାଇବୁ ସେଇଠାକୁ ଯିବୁ
ନିଶ୍ଚିନ୍ତେ ହୋଇବୁ ତୋଷ । ୨ ।
ସେଠାରୁ ତ୍ରିବେଣୀ ବହୁଛି ଉଜାଣି
ତହିଁରେ ଖେଳୁଛି ହଂସ
ଅମୁହାଁ ଦେଉଳେ ଘଣ୍ଟା ବାଜୁଅଛି
ନାହିଁ ରଜନୀ ଦିବସ । ୩ ।
ଅଣସୂତ୍ର ମାଳା ବାମ କରେ ଧରି
ଭଜୁଅଛନ୍ତି ମହେଶ
ମାଳା ହଜିଗଲେ ଭେଳା ବୁଡ଼ିଯିବ
କହଇ ଗୋରେଖ ଦାସ । ୪ ।