(କବିସୂର୍ଯ୍ୟ— ରାଗ କେଦାର, ତାଳ ତ୍ରିପଟା)
Kha Patala — Kisorachandrananda Champu
ଖ ପଟଳ — କିଶୋରଚନ୍ଦ୍ରାନନ୍ଦ ଚମ୍ପୂ
ଖେଳଲୋଳ ଖଞ୍ଜନାକ୍ଷି କି ସାହସ କଲୁ ରେ
ଖରାପ ତୁ ହେଲୁ ରେ । ଘୋଷା ।
ଖର୍ବ ହୋଇ ସୁରତରୁ କୁସୁମ ବାଞ୍ଛିଲୁ ରେ
ଖେଦ ବୀଜ ନିଜ ହୃଦ କେଦାରେ ବିଞ୍ଚିଲୁ ରେ । ୧ ।
ଖିଆଲ ପରି କି ଧନ ମନରେ ଭାଳିଲୁ ରେ
ଖଳିକାର ନୋହିଁ କଳା ନାଗକୁ ଚାଳିଲୁ ରେ । ୨ ।
ଖରା ସ୍ମରି ଝାଉଁଳିବା ଶ୍ରୀଅଙ୍ଗ ପାଇଲୁ ରେ
ଖମଣି ମଣ୍ଡଳକୁ ତୁ କର ବଢାଇଲୁ ରେ । ୩ ।
ଖାଇ ଦେଇ କି ଅମଳ ଅଚେତା ହୋଇଲୁ ରେ
ଖାରା ଖଣ୍ଡାଧାରା ଖଟ ବିଚାରି ଶୋଇଲୁ ରେ । ୪ ।
ଖଟେ ଅଷ୍ଟଦୁର୍ଗ ନାଥ ତୋ ପଦେ ପହିଲୁ ରେ
ଖଣ୍ଟ କରେ ଧନ ଦେଇ ପଦେ ନ କହିଲୁ ରେ । ୫ ।