(ବ୍ରଜନାଥ ବଡ଼ଜେନା)
ସଖୀ ଦେଖିଲି ଆଜ ମୁଁ ବ୍ରଜପତିଙ୍କି ଗୋ
ମନ ଅଭିରାମ ନବ ଚୂତ କାନ୍ତିକି ଗୋ । ଘୋଷା ।
ସଜଳ ଜଳଦ ନୀଳ ମଞ୍ଜୁଳ ତମାଳ ଦଳ
ଦଳିତ କଜ୍ଜ୍ୱଳ ଶ୍ୟାମ ଦ୍ୟୁତିକି ଗୋ । ୧ ।
କଟୀ ତଟେ ପୀତପଟ ଘନେ ଚପଳା ଚହଟ
ନଟବର ମନୋହର ମୂର୍ତ୍ତିକି ଗୋ । ୨ ।
ଶିଖୀ ଶିଖଣ୍ଡକ ଚୂଳ ସୁଷମ କୁସୁମ ମାଳ
ଲୁଳୁଥିଲା କଣ୍ଠୁ ପାଦ କତିକି ଗୋ । ୩ ।
ମୃଦୁ ମନ୍ଦ ମନ୍ଦ ହାସ ସୁରଙ୍ଗ ଓଷ୍ଠେ ପ୍ରକାଶ
ହୋଇ ନାଶେ ଅନାୟାସେ ଧୃତିକି ଗୋ । ୪ ।
ତ୍ରିଭଙ୍ଗୀ ଛନ୍ଦରେ ଉଭା ଶ୍ରୀକରେ ମୁରଲୀ ଶୋଭା
ଯହିଁ ବାଇ କଲେ କୁଳବତୀଙ୍କି ଗୋ । ୫ ।
ଦୀନ ବ୍ରଜନାଥ ରାତି ଦିନ ଏ କେଶୀ ଅରାତି
ରୂପ ଭାବୁଅଛି ଭବ ଭୀତିକି ଗୋ । ୬ ।