(ବ୍ରଜନାଥ ବଡ଼ଜେନା— ରାଗ ଧନାଶ୍ରୀ)
ଆଳି ବନମାଳୀ ଗୁଣ ଜପାମାଳି ହୋଇଲା
ଅଳି କେତକୀ ପରା ଯା ମୋତେ ସେ ନ ଚାହିଁଲା ରେ । ଘୋଷା ।
ଭାଳିଲେ କି ହେବ ଯେ ଯା ଅର୍ଜିଲା ତା ପାଇଲା
ଭାଳିଆଇ ତୁ ଯା କଲୁ ସେ ତ ମନେ ରହିଲା । ୧ ।
ଓଳିକି ଓଳି ଲାଗିଲୁ ତୋତେ ଲଙ୍ଘି ନୋହିଲା
ଓଳି ପଦାରେ ମନ୍ଦିରେ ତା ଗୁଣ ତ ପଇଲା । ୨ ।
ଗାଳି ଦେଲି ତାକୁ ଯେବେ ମୋ ପାଶକୁ ଅଇଲା
ଟାଳି ଦେଲାକୁ ତୁ ସିନା ବହପ ସେ ପାଇଲା । ୩ ।
ମିଳିଲେନି କେଳିକି ତା ଭଳି ଯେତେ ଛଇଳା
ତଳିପା ତଳେ ତ ଗୋପ ଭୂପପଣ ଥୋଇଲା । ୪ ।
କୁଳୀନ ଯୁବତୀ ମୋରେ ମଳି କାହୁଁ ଅଇଲା
ତାଳି ଧରିବାକୁ ଏବେ ନଳୀନଜ ବହିଲା । ୫ ।
କାଳୀ ଦଳି ନିଆଁ ଗିଳି ତୋଳି ଗିରି ଧଇଲା
ବଳିଗଲା ସେ ଦିନୁଟି ବ୍ରଜନାଥ ବୋଇଲା । ୬ ।