(ଗୋପାଳକୃଷ୍ଣ— ରାଗ କଲ୍ୟାଣ, ତାଳ ରୂପକ)
ଏଡ଼େ ଭାଗ୍ୟ ମୋର ହେବକି
ହେବି ବୃନ୍ଦାବନେଶ୍ୱରୀ ସେବକୀ
ଶ୍ରୀ ଗୁରୁଦତ୍ତ ବୀଜମନ୍ତ୍ର କଳପ
ବଲ୍ଲୀରେ ପ୍ରେମ ଫଳ ଫଳିବ କି । ଘୋଷା ।
ଶ୍ରୀ ସ୍ୱାମିନୀଙ୍କର ଯାବତ
ଅଷ୍ଟକାଳ ସେବା ସନ୍ତତ
ଶ୍ରୀ ରୂପମଞ୍ଜରୀ ଆଜ୍ଞା ଶିରେ ଧରି
କରିବି ମନୋରଥ ପୂରିବ କି । ୧ ।
ବ୍ରଜରାଜ କୁଳ ଚନ୍ଦ୍ରମା
ଦୋଷ କରିବା ପାଇଁ କ୍ଷମା
ଲଳିତାଙ୍କ ପଦାବ୍ଜେ ପଡ଼ି ଜଣାଇବା
ଶୁଭ ଦଶା ସମ୍ଭବିବ କି । ୨ ।
ଗୋଷ୍ଠେଶ୍ୱରୀ କୋଳରେ ମରି
ବଧୂ ସୁଖେ ଲାଳନା କରି
ସ୍ନେହେ ଅଶ୍ରୁ ପୋଛୁ ସ୍ୱେଶ୍ୱରୀଙ୍କ ଲଜ୍ଜା
ନମ୍ରମୁଖ ବିହି ଦେଖାଇବ କି । ୩ ।
ରାସ ରସାମୃତାବ୍ଧି ବିଧୁ
ଅଙ୍କରେ ଜଟିଳାଙ୍କ ବଧୂ
ବିଜେ କରିବାର ଦେଖି ମୋ ଆଖିର
ସୁଖ ଅକୂପାର ଉଚ୍ଛୁଳିବ କି । ୪ ।
ହୃଦେ ଧରି ସେ ଦୁଇ ରୂପ
ଶ୍ରୀ ମଞ୍ଜରୀ ସଖୀ କଳାପ
ବୋଲେ ଗୋପାଳକୃଷ୍ଣ ମୁଖେ ଶ୍ରୀ ରାଧାକୃଷ୍ଣ
ବୋଲି ଜୀବ ବରଜିବ କି । ୫ ।