(ଗୋପାଳକୃଷ୍ଣ— ରାଗ ଆନନ୍ଦ କାମୋଦୀ, ତାଳ ଖେମଟା)
କାହିଁକି ଶ୍ୟାମ ମୂରତି ଗୋ
ସଦା ଦିଶୁଛି ମୋତେ ଦିନ ରାତି ଗୋ । ଘୋଷା ।
ପଛୁ ଆସିଲା ପରି ହୁଏ ମତି
ଚାହିଁଲେ କେ ନ ଦିଶେ ଏ କି ରୀତି । ୧ ।
ଆସି ଆଗେ ରହୁ ହେଟି ଜରତୀ
ବୋଲୁ ମୋ ହୃଦେ ଲୁକୁଛି ଝଟତି । ୨ ।
ଆଖି ବୁଜିଲେ କୁଞ୍ଜବନେ ନିତି
ସ୍ୱପ୍ନେ ବୁଲାଉଛି ଏ କି ବିପତ୍ତି । ୩ ।
ଘରୁ ଅଗଣାକୁ ଯିବାକୁ ଭୀତି
ଲାଗିଲାନି ମୋତେ କହ କି ଗତି । ୪ ।
କୃଷ୍ଣ କୃଷ୍ଣ ବୋଇଲାର ଭାରତୀ
କାନରେ ପଡ଼ିଲେ ଥରୁଛି ଛାତି । ୫ ।
ଗୋପାଳକୃଷ୍ଣ ବୋଲଇ ବିଚ୍ଛିତି
ବଂଶରୁ ଏପରି ହେଉଛି ସ୍ଫୁର୍ତ୍ତି । ୬ ।