(ଗୋପାଳକୃଷ୍ଣ— ରାଗ ଧନାଶ୍ରୀ)
ଦୟା ନ କରନ୍ତୁ ମୁଁ ଦାସୀ ସିନା ରେ । ଘୋଷା ।
ଦୁଃଖ ଦେଇ ଶ୍ୟାମକୁ ରାଧା ସୁଖୀ ହେବାକୁ
ରୁଷିବ କଲୁ କି ଏ ଆଲୋଚନା ରେ । ୧ ।
ଯେ ତାଙ୍କ ମନୋହାରୀ ତା ନଉକରୀ କରି
ଦିନ ନେବି ପଛକେ ଗୁମାନ ନାରେ । ୨ ।
ଯାହାରେ ହେଲେ ସଖୀସେ ହୋଇଥିଲେ ସୁଖୀ
ମିଳିଲା ପରି କୋଟି ଲକ୍ଷ ସୁନା ରେ । ୩ ।
ଯଶୋଦାଙ୍କ ପୁଣ୍ୟରେ ଚିରଞ୍ଜିବୀ ବ୍ରଜରେ
ହୋଇ ସେ ସହୀ ରହିଥାନ୍ତି କିନା ରେ । ୪ ।
ନିକଟରେ କି ଦୂରେ ନିତି ଶ୍ରୀମୁଖ ଥରେ
ଦେଖୁଥିବି ଏତିକି ମୋ କାମନା ରେ । ୫ ।
ଗୋପାଳକୃଷ୍ଣ କହି ହସି ଭାଷିଲେ ସହୀ
କେ ତୋ ପଛରେ ରହିଛନ୍ତି ଅନା ରେ । ୬ ।