(ଗୋପାଳକୃଷ୍ଣ— ରାଗ ମାଳବଗୌଡ଼ା, ତାଳ ଆଠତାଳି)
ପରମେଶ୍ୱର ଶ୍ରୀ କୃଷ୍ଣ ବ୍ରଜେନ୍ଦ୍ର କୁମାର ହେ
ଯୁଗାନୁସାରରେ କରୁଛନ୍ତି ଅବତାର ହେ । ଘୋଷା ।
ଶ୍ରୀ ବଳରାମ ଶ୍ରୀ ନାରାୟଣ ଯା ବିଳାସ ହେ
ଶ୍ରୀ ନୃହରି ବାମନ ରଘୁବର
କେ କେତେ କଳାରେ ହେଲେ ପ୍ରଚାର
ଅଂଶ ଲେଶଟି ଆନ ଅବତାର
ସର୍ବୋତ୍ତଂସ ଶ୍ରୀ ରାଧା ପ୍ରାଣ ଯାର । ୧ ।
କୃତ ଯୁଗରେ କୋଟି ଦ୍ୟୁମଣି ଚନ୍ଦ୍ର ଦ୍ୟୁତି ହେ
ଧରି ହେଲେ ଅଦ୍ୱିତୀୟ ନୃକେଶରୀ ମୂର୍ତ୍ତି ହେ
ସୁପର୍ବଣଙ୍କ ଦୁଃଖ ନିର୍ବାପଣ
କରିବାକୁ ହୋଇ ଅତି ଭୀଷଣ
ପୁଣ୍ୟଜନ କୁଳ ଚକ୍ରବର୍ତ୍ତୀର
ପ୍ରାଣ ନେଲେ ନଖେ ଚିରି ଶରୀର । ୨ ।
ତ୍ରେତା ଯୁଗେ ଅଭିରାମ ରାମ ରୂପ ଧରି ହେ
ଦଶରଥ ପୁଣ୍ୟପୁଞ୍ଜ ଅରଣ୍ୟେ ବିହରି ହେ
ଧରାଭରା ଦଶ ଶିର ସଗୋତ୍ର
ସହ ନାଶି କଲେ ଲୋକେ ପବିତ୍ର
ସୁର ପୁରକୁ ସ୍ୱଦାସ ନିକର
ସଙ୍ଗେ ନେଇ କଲେ ଦେବ ଶରୀର । ୩ ।
ଦେବକୀ ସୁତ ରୂପରେ ହୋଇ ଆବିର୍ଭାବ ହେ
ଦ୍ୱାପରେ ଗୋପ ପୁରରେ ପାଳି ଗୋବ ଗାବ ହେ
ପୂର୍ଣ୍ଣ ପୂର୍ଣ୍ଣୋତ୍ତର ରୂପେ ପ୍ରକାଶ
ହୋଇ ପିଷ୍ଟପ ଦୁଷ୍ଟ ନାଶ
ମଥୁରା ଦ୍ୱାରାବତୀରେ ବିହାର
ଦ୍ୱିସପ୍ତ ଲୋକେ ହୋଇଛି ପ୍ରଚାର । ୪ ।
ପୂର୍ଣ୍ଣୋତ୍ତମ ରାଧା ପ୍ରାଣନାଥ କୃପାସିନ୍ଧୁ ହେ
ବ୍ରଜ ଯୁବତୀ ନିରଭସନ୍ଧ ପ୍ରେମ ବନ୍ଧୁ ହେ
ସ୍ୱପ୍ରେମ ଦେବାକୁ କଳିଯୁଗରେ
ସଂକୀର୍ତ୍ତନ ପ୍ରିୟ ଶଚୀ ଗର୍ଭରେ
ଜନ୍ମିଲେ ଶ୍ରୀ ପ୍ରତାପରୁଦ୍ରଙ୍କର
ଜୀବନର ପ୍ରଭୁ ଗୌରସୁନ୍ଦର । ୫ ।