(ବୀରମିତ୍ରୋଦୟ— ରାଗ ନଳିନୀଗୌଡ଼ା, ତାଳ ତ୍ରିପଟା)
ନ ପଚାରି ଜାଣି ଜାଣି ମତିକି ମୁଁ ହୁଡ଼ିଲି ରେ
ଲମ୍ପଟିଆ ପ୍ରୀତି ପଟଳରେ ପଡ଼ି ବୁଡ଼ିଲି ରେ । ଘୋଷା ।
ଲାଭ ଏତିକି ଚରମେ ଦରଦ ହେଲା ମରମେ
କେଣିକି ମନ ନ ରମେ କି ଭରମେ ପଡ଼ିଲି ରେ । ୧ ।
ନୃଶଂସକୁ ଯେ ନିରତେ ପ୍ରଶଂସୁ ମୋହ ପୁରତେ
ତୋ କଥା କରି ପରତେ ଏ ଦୁର୍ଦ୍ଦଶା ଲୋଡ଼ିଲି ରେ । ୨ ।
ଗଗନ ଶଶୀକି କର ଲଗନ କରି ନିକର
ପିଇବି ସୁଧା ଶୀକର ଆଶା ଧରି ସଢ଼ିଲି ରେ । ୩ ।
ସଙ୍ଗିନୀ ହିତ ବଚନ ନ ମାନି କଲି ମୋଚନ
ତେଣୁ ଏ ଅନୁଶୋଚନ ସରିତରେ ବୁଡ଼ିଲି ରେ । ୪ ।
ସ୍ୱର୍ଣ୍ଣପୁର ଯୁବନାଥ ଭାଷେ ସଙ୍କେତ ସନାଥ
ଆସି ଯା ହେଲି ଅନାଥ କୁଳଭୟ ଛାଡ଼ିଲି ରେ । ୫ ।