(ବୀରମିତ୍ରୋଦୟ— ରାଗ କାମୋଦୀ, ତାଳ ଆଦିତାଳ)
ମୋହନ ବଞ୍ଚାଇ କହିଲେ କି ହେବ ଆଉ
ଶ୍ୟାମ ହେ ଛନ୍ଦ ବଚନରେ । ଘୋଷା ।
ପାଳି ସ୍ନେହ ତୋଷରେ କାଲି କାହା ବାସରେ
ବଳୀଶୋଭୀ ପାଶରେ ମିଳି ସୁବେଶରେ
ସଲୀଳ ହାସରେ
ଛଳି ବାନ୍ଧି ରଖିଲା ଦୃଢ଼ ଭୁଜପାଶରେ
ଭୁଲି ପରିହାସରେ
କଳି କି ନ ପାରିଲ ରଜନୀ ବିଶେଷରେ । ୧ ।
ନବ ଚତୁରୀବର ଅବଧାନ ମାତର
ଅବଶେ ତରତର ହେ ନବ ଜଳଧର
ସୁବର୍ଣ୍ଣ ସୁନ୍ଦର
ଅବଶ୍ୟ ଭିଡ଼ିଥିବ ଲଗାଇ ଭୁଜାନ୍ତର
ତବ କଳେବର
ଅବଲୋକନେ ଦିଶେ କୁଙ୍କୁମେ ଜରଜର । ୨ ।
ଧରି କି ଅଭିମାନ ପରିଚାର ଗୁମାନ
କରିଥିଲା ସେ ମାନ ହରି ତା ସମ୍ମାନ
କରି ଗୁଣଗାନ
ଧରି ଚରଣ ଶିର ଲଗାଇ କଲ ମାନ୍ୟ
ପରିଶେଷ ମାନ
କରିଛି ପଦ ଲାକ୍ଷା ଚନ୍ଦ୍ରକେ ଦ୍ୟୋତମାନ । ୩ ।
ରସିକା ସେ କୋଳରେ ବଞ୍ଚିବାର କାଳରେ
ମିଶି ପ୍ରେମ ଭୋଳରେ ହସି ଚପଳରେ
ରସି କପୋଳରେ
ଘଷି ଗଣ୍ଡ ଚୁମ୍ବିଛି ତା ତାମ୍ବୂଳ ବୋଳରେ
ବସିଛି ଉଜ୍ଜ୍ୱଳରେ
ଭାଷିଲା ବୀରମିତ୍ରୋଦୟ କହି ଛଳରେ । ୪ ।