(ବୀରମିତ୍ରୋଦୟ— ରାଗ ମଲ୍ଲାର, ତାଳ ତ୍ରିପଟା)
ଆସ ଆସ ଧନ ରେ ପାଶେ ବସ ରେ
କି କହିଛନ୍ତି ମୁରଲୀଧର ଥରେ ଭାଷ ରେ । ଘୋଷା ।
ଅତରକିତ ଭାବରେ ଯାଉଁ ତାଙ୍କ ପାଶରେ
ଦେଖାଗଲା କି ମଧୁର ରଙ୍ଗାଧରେ ହାସ ରେ । ୧ ।
ଜଣାଗଲା ସ୍ନେହ ଥିବା ପରି କି ତାଙ୍କର ରେ
ପଚାରିଲେ କି ଆଦରେ ଧରି ତୋହ କର ରେ । ୨ ।
ତୋ ବାଣୀ ଶ୍ରବଣେ ଧରି ପୂରୁବ କରୁଣା ରେ
କଲେ କି ନାଗରମଣି ହୃଦୟ ଫୁରୁଣା ରେ । ୩ ।
କରିପାରିଲୁ କି ସଖୀ ଅଳପ କଳଣା ରେ
କରିବା ପୀରତି ହୋଇ ନାହିଁ କି ଅଲଗା ରେ । ୪ ।
ମୋହ ପରି ଅବଶରେ କୁସୁମ ନାରାଜରେ
କରଇ କି କିଛି ହେଲେ ମନକୁ ନାରାଜ ରେ । ୫ ।
କରି ଅଙ୍ଗୀକାର ଥରେ କୁଞ୍ଜେ ଆସିବାକୁ ରେ
କରିବେ କି ଅନୁକମ୍ପା ପାଶେ ବସିବାକୁ ରେ । ୬ ।
କହେ ବୀରମିତ୍ରୋଦୟ ଦେବ ଯୁବରାଜ ରେ
ସତେ କି ସେ ପ୍ରିୟ ମୋତେ ଦେଖା ଦେବେ ଆଜ ରେ । ୭ ।