(ବୀରମିତ୍ରୋଦୟ— ରାଗ ଶ୍ରୀ, ତାଳ ଆଦିତାଳ)
କେ ଅଛି ତୋ ବିନା
ମୋ ସାହା ନବୀନା ଏ ବ୍ରଜେ । ଘୋଷା ।
ପ୍ରାଣ କରି ଦେଖିବାକୁ ମୋ ସ୍ନେହ ପରଖିବାକୁ
ଉପଦେଶ ଯୋଖିବାକୁ ବିପଦରୁ ରଖିବାକୁ । ୧ ।
ଆସି ମୋ ପାଶେ ବସିବ ପରିହାସରେ ରସିବ
କୁତୁକ ବଶେ ହସିବ ହିତବଚନ ଭାଷିବ । ୨ ।
ଅନାଇ ମୋର ଆରତି ତୋଷିବ କହି ଭାରତୀ
ଶୁଣି ପର ଅକୀରତି ହୃଦୟ ହେବ କରତି । ୩ ।
ମନେ ରଖି ପ୍ରାଣ ପରା କରିବ ମୁଖେ ଟାପରା
ଅପ୍ରିୟ ହେଲେ ଅପରା ଦଣ୍ଡିବ ତାକୁ ତୋ ପରା । ୪ ।
କହେ ବୀରମିତ୍ରୋଦୟ ସିଂହ ତୁ ମୋର ହୃଦୟ
ନ ହୁଅ ସଖୀ ନିର୍ଦ୍ଦୟ ତେଜ ଛଳ ସମୁଦୟ । ୫ ।