(ଗୌରଚନ୍ଦ୍ର ଗଜପତି— ରାଗ ଭାଟିଆରୀ, ତାଳ ଅଟ୍ଟତାଳ)
ଆଜ କୁନ୍ଦରଦନା କାହିଁକି ବିମନା
କେ କି ଲଗାଇ ମୋ ନାଁରେ କହିଛି ନା । ଘୋଷା ।
କେବେ ନ ଥିଲା ଗୁମାନ ଆଜ କାହିଁକିରେ ଧନ
ନ କହୁ ପ୍ରେମ ବଚନ ସ୍ନେହାଧୀନା । ୧ ।
ରସାଳସା ରସାଭୂଷା ଯୋଷା ନ ଭାଙ୍ଗ ମୋ ଆଶାଅ
ରସାଭୂଷା ଲୋକହସା ତୁ କରନା । ୨ ।
କଳ୍ପଲତା ପ୍ରିୟସଙ୍ଗୀ ଅଳ୍ପକେ ଦେଉଛୁ ଭାଙ୍ଗି
ସ୍ୱଳ୍ପ ହୋଇ ନାଶୁଛୁ ଦୟାଳୁ ବାନା । ୩ ।
ରୋଷ ଥିଲେ ତୋ ଚିତ୍ତରେ ବାନ୍ଧି ବାହୁ ଯୁଗଳରେ
ନଖାଙ୍କୁଶ ମୋ ଉରରେ ମାର ସିନା । ୪ ।
ଗୌରଚନ୍ଦ୍ର ଗଜପତି ଭାଷନ୍ତି ମୃଦୁ ଭାରତୀ
ଟେକି ତୋ ବଦନଶଶୀ ବାରେ ଅନା । ୫ ।