(ଗୌରଚନ୍ଦ୍ର ଗଜପତି— ରାଗ ରାମକେରୀ, ତାଳ ଆଦିତାଳ)
କାହାକୁ କହିବି କିସ ରେ ସଙ୍ଗାତ
ଯାହାକୁ ମୋହର କରି ଘେନିଥିଲି
ତାହାକୁ ହୋଇଲି ବିଷ ରେ । ଘୋଷା ।
ଆସିବେ ସେ ବୋଲି ଚାହିଁ ବସିଥିଲି
ହୋଇ ଅଙ୍ଗେ ଦିବ୍ୟ ବେଶ
ରହିଲେ ସେ କାହିଁ ରାତିକି ପୁଆଇ
ଦେଇ ମୋତେ କାମ ତ୍ରାସ ରେ । ୧ ।
ପ୍ରାତେ ଆସି ଯେତେ ରୂପେ ମୋ ଅଗ୍ରତେ
ଭାଷିଲେ ବିନୟମାନ
ପ୍ରତେ ତା କିଞ୍ଚିତେ ନ ଘେନି ମୁଁ ଚିତ୍ତେ
ଅଧିକେ କଲି ଗୁମାନ ରେ । ୨ ।
ସରାଗରେ ପୁଣି ମୋତିହାର ଆଣି
ମୋ ଆଗରେ ଯାଚୁଥିଲେ
ବିରାଗ ମୁଁ ବହି ଅବହେଳେ ତହିଁ
ଦୃଷ୍ଟିକି ନ ଦେଲି ଭଲେ ରେ । ୩ ।
ପଟୁବର ବହୁ ଆରତରେ ତହୁଁ
ଲୋଟିଲେହେଁ ପାଦ ତଳେ
କଟୁ ପ୍ରାଏ ମଣି କପଟରେ ଗଣି
ଛାଟିଦେଲି ସେହି କାଳେ ରେ । ୪ ।
ନିଜ ସଖୀ ବୋଧ ନ ରଖିଲି ମଧ୍ୟ
ବ୍ରଜରାଜ ଗଲେ ଲାଜେ
ଗଜପତି ଗୌରଚନ୍ଦ୍ର କହେ ଆଜ
କରିବେ ଅବଶ୍ୟ ବିଜେ ରେ । ୫ ।