(ଗୌରଚନ୍ଦ୍ର ଗଜପତି— ରାଗ ନାଦରାମକେରୀ, ତାଳ ଆଦିତାଳ)
କି ଘେନି ମାନସରେ କରିଛି ବିନା ଦୋଷରେ
କୋପ ମୋ ଠାରେ ରେ ସଜନୀ । ଘୋଷା ।
କେତେ ପରି ମୁହିଁ କହିଲି ମନାଇ
ନ ଶୁଣିଲା ଥରେ ତା ଶ୍ରୁତି ପଥରେ
ଅଶ୍ରୁ ଧାର କରି ହାର
ବସିଲା ଗୁରୁ ଗୁମାନରେ । ୧ ।
ନ ଜାଣିଲି ବୋଲି ବସନ ପ୍ରସାରି
କହିଲେ ମୁଁ ଯେତେ ମୁଖ ମୋଡ଼ି ତେତେ
ନାରୀ ଈଶ ବହି ରୋଷ
ନ ଚାହେଁ ନେତ୍ର କୋଣେ ଥରେ । ୨ ।
କିଣାଦାସ ତୋର ମୁହିଁ ରାମାବର
ତୋ ହତାଦରରେ ମାର ଶର ମାରେ
କର ତ୍ରାହି ପ୍ରାଣସହୀ
ବୋଲୁ ଅଧିକ ରୁଷିଲା ରେ । ୩ ।
କରଜ ମୁନରେ ଗାର ଧରଣୀରେ
କାଟି ନିରନ୍ତର ଦେଲା ସେ ଅପାର
ଦୁଃଖ ମୋତେ ଏବେ ଚିତ୍ତେ
ଚିନ୍ତା ଅନଳ ଜାଳିଲା ରେ । ୪ ।
ଗଜପତି ଗୌରଚନ୍ଦ୍ର ଦେବ ମୋର
ଅଟେ ଗଳାହାର ବୋଲି ଘୋଷିବାର
ପାଶୋରିଲା ନବ ବାଳା
ଦେଖିଲେ ମୁଖ ପୋତିଲା ରେ । ୫ ।