(ଗୌରଚନ୍ଦ୍ର ଗଜପତି— ରାଗ ତୋଡ଼ି, ତାଳ ଏକତାଳି)
ରେ ସହୀ କେହି ସେ ନବ ନାଗର
ଚାହିଁଦେବାରେ ତା ବଦନ ଚନ୍ଦ୍ରକୁ
ରହିଲା ନେତ୍ର ଚକୋର । ଘୋଷା ।
ଶକ୍ରଚାପ ଭୂରୁ ଚାରୁ ନୟନର
ଅଞ୍ଜନ ରଞ୍ଜନ ଗୁଣ
ବକ୍ର ଚାହାଣୀ ଶରେ ମାରିନେଉଛି
ହୃଦ ହରିଣର ପ୍ରାଣ । ୧ ।
ନବୀନ ତମାଳ ତରୁ ଜିତ କଳେ
-ବର ନୀରଦ ତାହାର
ଛବି ଦେଖିଦେଲେ ଦ୍ରବି ହୋଇଯିବେ
ପବି ଭୟେ ଗିରିବର । ୨ ।
ଚଳାପାଙ୍ଗୀ ମୋର ମାନସେ ମଣିଲି
ନିଶ୍ଚେ ଏ ଘନ କାଳିଆ
ଖେଳାଉଛି ହୃଦେ ହାର ଚପଳାକୁ
ଦେଖାଇ ଶିଖିଚୂଳିଆ । ୩ ।
କଟୀ ପୀତାମ୍ବର ଉପରେ କିଙ୍କିଣୀ
ସ୍ତନିତରେ ଦଶ ଦିଶ
ଘୋଟି ଆସି କି ମୋ ମନ ଚାତକକୁ
ଦେବ ପ୍ରେମ ଘନ ରସ । ୪ ।
ଏପରି ରମଣୀମଣି ବାଣୀ ଶୁଣି
ଗୋପ ନାରୀବର ସେହି
ଭୂପତି ତାରକାବୃନ୍ଦ ଚନ୍ଦ୍ର ଗୌର
-ଚନ୍ଦ୍ର ଗଜପତି କହି । ୫ ।