(କୃଷ୍ଣଚନ୍ଦ୍ର ନୃପ— ରାଗ ଆଭୀରୀ, ତାଳ ଯତି)
ମିତ ଅନା ଅନା ଗୋ
ଏହି ପରା ବ୍ରଜରାଜ କାହ୍ନା ଗୋ । ଘୋଷା ।
ତ୍ରିଭଙ୍ଗୀରେ ଉଭା ହୋଇ ମୁରଲୀ ଅଧରେ ଦେଇ
ବାଙ୍କ ନୟନରେ ଚାହିଁ ହରୁଛି ଚେତନା ଗୋ । ୧ ।
ଶିରେ ଶିଖୀପୁଚ୍ଛ ଚୂଡ଼ା ତହିଁ ସେବତୀ ପାଖୁଡ଼ା
ଯୁବତୀଙ୍କ ଘରବୁଡ଼ା ସେ କାଳିଆ ସୁନା ଗୋ । ୨ ।
ଦେଖି ସେ ମୋହନ ମୂର୍ତ୍ତି ରହିବ କାହାର ଧୃତି
ହେଲେ ପତିବ୍ରତ ମତି ନ ହେବ କି ଚୂନା ଗୋ । ୩ ।
ଶ୍ରୀମତୀ ବୋଲନ୍ତି ଦୂତୀ ସେ ମୋ ନୟନ ସମ୍ପତ୍ତି
ସେ ପୟରେ କୃଷ୍ଣଚନ୍ଦ୍ର ନୃପତି ଭାବନା ଗୋ । ୪ ।