(ଗୋପାଳକୃଷ୍ଣ— ରାଗ ଆନନ୍ଦ କେଦାର, ତାଳ ଆଡ଼ତାଳି)
ଶ୍ୟାମଳ ନିର୍ମ୍ମଳ ଜଳଧର ଛବିକି । ଘୋଷା ।
ଲାଜ ପତି ପିତା କୁଳ ଜଳଧି କରି ଚଉଳ
ପ୍ରୀତି ଲାଗି ରାଧା ତନୁ ଦେଲାନି ବିକି । ୧ ।
ଜାଣରେ ସଜନୀ ଜୀବ ଯେବେ ହେଲେ ବରଜିବ
ଛାଡ଼ିଦେଲେ ସବୁଦିନେ ଜୀଇଥିବି କି । ୨ ।
ଆଜ ଯାଏଁ ଆଜନମୁ ବରତ କେତେ କରି ମୁଁ
ବର ମୁଁ ମାଗୁଛି ନିତି ସେବି ରବିଙ୍କି । ୩ ।
ବଳାରାତି ମଣି ମୋର ଗଳାର ଛଇଳାବର
ମୁଁ ଯୋଗୀ ସେ ଥାଳ ତେଜି ବରତିବି କି । ୪ ।
ଉପାୟ କହୁଛି ତୋତେ ବିଷ ଗୋଳି ଦେ ମୋ ହାତେ
ମନା କରନା ତୋ କଥା ନ ପାଳିବି କି । ୫ ।
ଗୋପାଳକୃଷ୍ଣ ଭାଷିତ ଆଳୀ ବୁଝିବାକୁ ଚିତ୍ତ
ପଚାରିଲେ ବିଜେ କର ବୃନ୍ଦାଟବୀକି । ୬ ।