(ମୋହନ ଗୋସେଇଁ— ରାଗ ମାଳବ କୌଶିକ, ତାଳ ଯତି)
ମଦନ ମୋହନ ବୃନ୍ଦାବନ ଧନ
ନମାମି ହେ ଶ୍ରୀହରି
(ପଡ଼ି)
କାନ୍ତି ନବଘନ ପଦ୍ମ ଲୋଚନ
ଭାଲେ ଚନ୍ଦନ ଇନ୍ଦୁ ନିନ୍ଦନ
ଅଧର ମୋହନ ବଂଶୀ ବଦନ
କୋଟି ରତିପତି ଦର୍ପହାରୀ । ଘୋଷା ।
ବହୁ ରତ୍ନ ହାର ଦେଲି ଉପହାର
ସୁସମାଦି ଏ ସାରି
(ପଡ଼ି)
ରସିକ ନାଗର ସୁରସ ସାଗର
ଗୋବର୍ଦ୍ଧନ ଧର କାଳୀ ବିଷହର
ନନ୍ଦକୁମର ଯୁବତୀ ଚିତ୍ତଚୋର
ଦୟା କର ବାରେ ରାବଣାରି । ୧ ।
ଶ୍ରୀ ରାଧା ନାୟକ ଭକ୍ତି ପ୍ରଦାୟକ
ଜୟ ନୀଳାଦ୍ରି ବିହାରୀ
(ପଡ଼ି)
ଯାମଳାର୍ଜ୍ଜୁନ ଭଞ୍ଜନ ଘନ
ଶ୍ୟାମ ହେ ଦେବ ଦେବ ବନ୍ଦନ
କେଶବ ମର୍ଦ୍ଦନ ତ୍ରିତାପ ଖଣ୍ଡନ
ଦୟା ହେଉ ଦୀନେ ପ୍ରେମ ବାରି । ୨ ।
ନ କଲେ କରୁଣା ଆହେ ଦୀନବନ୍ଧୁ
ନିଶ୍ଚେ ଗଲିଟି ସରି
(ପଡ଼ି)
ଭାଷଇ ମୋହନ ହେ ମଧୁସୂଦନ
ଗୋପୀ ଭାବେ ହୃଦ ହୁଅଇ ଉଚ୍ଛନ୍ନ
ନିକୁଞ୍ଜ କାନନେ କରି ବଂଶୀ ସ୍ୱନ
ଦେଖିବା ନୟନେ ବାରେ ରାସେଶ୍ୱରୀ । ୩ ।