(ଶିଶୁ ଅନନ୍ତ ଦାସ— ରାଗ ମଧୁମଞ୍ଜରୀ, ତାଳ ଆଡ଼ତାଳି)
ଅବନା ଅକ୍ଷର ଜପ
ଯିବ କୋଟି ଜନ୍ମ ପାପ
ଅସାଧନା ମାର୍ଗେ ରହି
ଅମାପକୁ ହୃଦେ ମାପ । ଘୋଷା ।
ଦନ୍ତ ଓଷ୍ଠ ନ ହଲିବ
ଶିର କଣ୍ଠ ନ କମ୍ପିବ
ମନ୍ତ୍ର ଯନ୍ତ୍ର ନାହିଁ ତହିଁ
ଦେଖିବ ବ୍ରହ୍ମ ସ୍ୱରୂପ । ୧ ।
ବ୍ରହ୍ମା ବିଷ୍ଣୁ ସଦାଶିବ
କରି ନ ପାରନ୍ତି ଠାବ
ଶେଷଦେବ ନ ପାଇଲେ
କୋଟି ଜନ୍ମ କରି ତପ । ୨ ।
ସସ୍ରଦଳଠାରେ ଅନା
ବିଜେ ନନ୍ଦସୁତ କହ୍ନା
ବାମେ ଭାନୁରାଜଜେମା
ଝଟଝଟ ବିଦ୍ୟୁଭାବ । ୩ ।
ବାଜୁଛି ସପତ ସ୍ୱର
ଶୁଭଇ କେଡ଼େ ମଧୁର
ସେ ସ୍ୱରେ ହୋଇ ବିଭୋର
ଜୀବ କରୁଥାଇ ଧାପ । ୪ ।
ନ ଯା ତୀର୍ଥବ୍ରତ କରି
ହୃଦେ ଜପ ରାମ ହରି
କହନ୍ତି ଅନନ୍ତ ଶିଶୁ
ତରିବୁ ଏ ଭବକୂପ । ୫ ।