(ଗୋପାଳକୃଷ୍ଣ— ରାଗ ନୀଳକେଦାର, ତାଳ ଯତି)
ଯାଚି କଥା କୁହାଯିବରେ ଜାଣିମୁ ଥା । ଘୋଷା ।
ଲଳିତ ତ୍ରିଭଙ୍ଗ ଭଙ୍ଗୀ ନଟବର ସଜ
ବରହ ଉତ୍ତଂଶ ବଂଶୀବସା ମୁଖାମ୍ଭୋଜ
ଯଦି ମନରେ ପଡ଼ିବରେ । ୧ ।
ବିଧୁ ଉଦୟରେ କି କୁମୁଦ ନ ଫୁଟିବ
ଚନ୍ଦ୍ରକାନ୍ତ ମଣିକି ଦରବି ନ ସ୍ରବିବ
ଆସନ୍ତୁ ସେ ଜଣାଯିବରେ । ୨ ।
କ୍ଷଣ ନ ଦେଖିଲେ ଯାହାଙ୍କୁ କୋଡ଼ିଏ ଥର
ଆଳୀଙ୍କି ପଟାଇ ଅଣାଉ ଥାଇ ଖବର
ସେ ଲୋଭ କି ଛାଡ଼ିହେବରେ । ୩ ।
କାଳୀୟ ମଥାରେ କଲା ଦିନ ସେ ନର୍ତ୍ତନ
ଯାହା ହୋଇଗଲୁ କରିଥିଲୁ ଯେ ଗୁମାନ
ଚିନ୍ତା ଚିତ୍ତେ କି ନ ଥିବରେ । ୪ ।
ଅଭିମନ୍ୟୁ ସକୁଟୁମ୍ବ ହୋଇ ମଥୁରାକୁ
ଯିବ ବୋଲି କାଲି କହୁଥିଲା ଜଟିଳାକୁ
ପଡ଼ିଛି ତ ଉପଦ୍ରବରେ । ୫ ।
ଛନ୍ନ ହୋଇ ଶ୍ରୀ ରାଧିକା ଆଳୀଙ୍କି ପଚାରୁ
ସେ କହନ୍ତି ପଠାଇଛି ପୂର୍ଣ୍ଣମାସୀ ଠାରୁ
ଗୋପାଳକୃଷ୍ଣ ଆସିବରେ । ୬ ।