(କବିସୂର୍ଯ୍ୟ— ରାଗ ପିଲୁ)
ଅରୁଣାମ୍ବୁଜ ଚରଣା ତୁ ରସାରେ ଭରସାରେ
କରୁଣାନିଧି ଶରଣାଗତଠାରେ କି ରୁଷାରେ ।ପଦ।
ଅସିତ କେଶି ମୁଁ ତୋ ପରିଚାର
ରୁଷିକି ନ କରି କିଛି ବିଚାର
ସ୍ଵଗୁଣ ସରିତ ପତି ତୋ ପରିତ ନାହିଁ ସରସାରେ ।୧।
ନ ରହି ସୁଦନ୍ତି ବଦନ ପୋତି
କଳପ ଅଳପ ହସନ ମୋତି
ମୃଦୁଳ-ସରସ-ରସ ହୃଦୟା ତୁ ହୋ ନା ପରୁଷାରେ ।୨।
ନନେ ଉନ୍ମାଦ ଧୃତିକି ଛାଣି
ଗରଳ ଗିଳିବଟି ପିକବାଣି
ତରକି ହୃଦୟ କର କିଶଳୟ ଗଣ୍ଡେ ତ ରସାରେ ।୩।
ନକର ମୁକୁରମୁଖୀ ନିରାଶ
ବିଷମ ବଡ଼ କୁସୁମ ଶରାସ
ସହଜରେ ମିତ ବଚନ ଅମୃତ ଧାରା ବରଷାରେ ।୪।
ଅତିରତି ପରି ଚିନ୍ତି ସୁଧୀର
ନୀତି ପୁଣି ମୁରମଥ ନ ଗୀର
ଅଷ୍ଟଦୁର୍ଗପତି କହେ ସ୍ମିତବତୀ ହେଲେ ତରସାରେ ।୫।